::: تغطية حـفـل الشـيوخ الـعـقـايـلـة لـلـشـيـوخ الـربـاعـيـن :::

تحيه عطره



واسعد الله جميع اوقاتكم بكل خير



في ليلة فريدة ، مميزه ، رائعه ، اكتملت فيها جميع معاني الجمال ، وصور الإبداااع



أجواء رائعه ، تواصل مستمر ، لقاء متجدد ، عطاء بلا حدود


تكاتف وتآلف ، تعارف ومؤازره ، ماقف وحمياء


حب وتقدير ، صدق وإخلاص ،



هذا باختصار ما حدث في حفل شيوخ قبيلة العصمة العقايلة لتكريم شيوخ الروقه الرباعين



فقد ارتسمت في هذا الحفل جميع معاني الجمال والروووعه والإبداااع



فقد حضر من الشيوخ الرباعين:

الشيخ/ ناصر بن بندر بن ربيعان
الشيخ/ عقاب بن بندر بن ربيعان
الشيخ/ نايف بن هداج بن ربيعان
الشيخ/ مشاري بن هداج بن ربيعان

وعدد من الشيوخ الرباعين ممن لا تحضرني اسمائهم

[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]
[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

وقد حضر من مشائخ عتيبه وأعيانها:

الشيخ/ تركي بن خالد الهيضل
الشيخ/ فيحان بن نقاء ابو لهب بن فهيد
الشيخ/ نواف بن عبدالعزيز بن رازن
الشاعر الكبير/ تركي الغنامي
الشاعر المعروف/ عواض الربيعي


وقد حضر من مشائخ وأعيان قبيلة العصمة:

الشيخ/ عبدالله بن حماد العصيمي
الشيخ / حمدان بن محمد بن عوده العصيمي
الشيخ/ ضاوي بن زيد ابو كتيفة "شيخ العمرية"
الشيخ/ مستور بن فاهد "شيخ الشفعان"
الشيخ/ حمود بن خيشوم "شيخ النباعين"
الشيخ/ عيد بن عوض الوباري "شيخ الشجاعين والعصمة بوادي جليل"
الشيخ/ فواز الحلحلي وجماعتة من تربه
الشيخ/ مقعد بن خضر بن قطنان العصيمي
الشيخ/ عبدالله بن حسن بن مرزن وجماعته
رجل الأعمال الشيخ/ عبدالمحسن بن بعيجان العصيمي
رجل الأعمال الشيخ/ محمد بن زقيحان العصيمي
رجل الأعمال الشيخ/ محيسن الصماح العصيمي
العميد الدكتور/ محمد بن عبدالمحسن بن خميس العصيمي
العميد الطيار/ سعود بن عبدالله الوباري العصيمي
العميد/ سلطان بن سعد النبعاني العصيمي
العقيد/ أحمد بن ضاوي ابو كتيفه العصيمي


وقد حضر من خارج قبيلة عتيبه:

الشيخ/ محمد بن سالم الودعاني الدوسري
الشيخ/ حمد بن سالم الودعاني الدوسري
الشيخ/ سعد بن سالم بن الودعاني الدوسري
الشيخ/ صالح العيفان الدوسري

وعدد من مشائخ قبيلة قحطان وعدد من القبائل الأخرى ممن لا تحضرني اسمائهم



وقد بداء الحفل الخطابي بمقدمة ترحيبية بالضيوف

ثم تلاها تلاوة عطرة من القرآن الكريم القاها/ سلطان بن قبلان العصيمي

بعدها تشرف الشيخ/ خالد بن محمد العقيلي بإلقاء كلمة ترحيبية نيابة عن العقايلة شيوخ قبيلة العصمة


ثم تشرف الشيخ/ حمود بن حسن بن خيشوم "شيخ النباعين" بإلقاء كلمة رائعه لما عُرف عن هذا الشيخ من طلاقة اللسان وبلاغة الكلام وارتجالية الإلقاء فكانت كلمة رائعه نظراً لاسلوبه المميز في الإلقاء ومعرفة كيفية إنتقاء كلمته.



بعدها تشرف الشيخ/ عيد بن دخيل الوباري "شيخ الشجاعين والعصمه بوادي جليل" بإلقاء كلمة رائعه لما عرف عن هذا الشيخ الجليل من كلمات معبرة ، تظهر من قلب ملئ بالحب والوفاء للقبيلة وأبنائها ، وما مواقفه المشرفه لأبناء القبيلة وأراضيها إلا دليلاً على ذلك.


بعد ذلك القاء الشاعر الكبير المبدع شاعر المواقف/ غالب ابو كتيفة قصيدة ملحمية قال فيها:




عسى غر السحاب اللي يخيل بين حين وحين
ليا منه جهز تمسي البدايع منه مسيوله
ابيه يهل وبله لين اشوف شيوخنا راضين
وابيه يهل وبله لين اشوف الناس مذهوله
باسم قيف وباسم شيخ مقامي في لزومه دين
اقوم للازمه لو ما يجيني غير مرسوله
هلا بعتيبه الغالين عند عتيبه الغالين
هلا عد السحاب ليا نشى وانهلت ثعوله
تراحيب يقدمها العقيلي طيب الجدين
تراحيب لكل اللي حضر فالحفل موصوله
تراحيب باسم خالد سليل السيف ابو حدين
عقيليٍ من الطنخه تشوم البنت لفعوله
وانا مدحي لخالد ما يقلل من دها الباقين
عقايلةٍ يضدون الخصيم ليا تعدووا له
على قول المثل ذكر الحيا والطيبين يبين
واهل لظيا تعد فعولهم ما هيب مجهوله
ولا انسى ربعي عتيبه حزامي فالقسى واللين
هل الوقفات وانصار الامام موحد الدوله
عتيبه والقبايل كلها عن فعلنا دارين
سيوف في وجيه الشر واهل الشر مسلوله
عتيبه ما نلين ولو صماصيم الجبال تلين
ولا يأثر علينا من خرب فكره ومعقوله
عتيبه والقبايل كلها تعرف عتيبه زين
ميامين عطوا عبدالعزيز العهد واوفوا له
ولا زلنا على هاك العهد ونجدده ذا الحين
ولانا من هذا المنبر نبرهن عنه ونقوله
لابو متعب وابو خالد عيال مطوع العاصين
ليا جت سيرته بالمغفره والرحمه ادعوا له
عسى الله يرحمه وينزله منزال عليين
ويغفر له نهار الهول وينجيه من هوله
نبي الليله نجدد فالقصيد ونكسر الروتين
بعد عبر الاذاعه جتني الاخبار منقوله
لقيت الناس فالمظهر سوا والفرق في ثنتين
نفوس معززه ومكرمه ونفوس مذلوله
وانا ما قمت اغني غير ابرضي عين واكحل عين
واكيد العين ما ترتاح لين تبات مكحوله
وابكحلها واكثر كحلها لين تهدا وتزين
لعل الكحل ينفعها وترقد ليلها طوله
والا ياللي تسولف فالقفا وينك وحنا وين
ولا يمكن تعانقنا وشخصيتك مشلوله
دريت انك مرايه فالوجيه وفالقفا سكين
وفي خاطرك مني عقدةٍ ماهيب محلوله
لكن اصبر بما في خاطرك والنا لقاء بعدين
واذكرك الكلام اللي تفلسف فيه وتقوله



بعد ذلك القى الشاعر الكبير والمعروف/ ضاوي العصيمي "ليزر الهيلا" قصيدة تعبر عن قوة الشعر التي يمتلكها هذا الشاعر حيث قال فيها:





عداد براقٍ شعاني شعاعه
يوم يتعقرب في المزون المباكير
يا مرحبا باهل الكرم والشجاعه
ترحيبٍ احلى من حليب المصاغير
للي رفيع المجد نالوا فراعه
وعلى قراه اخذوا شهاده وتقرير
سربة رباعينٍ ليا جات باعه
يروون بالدم السيوف البواتير
عدوهم لن عاش ينقل كراعه
ويحتار في جبره كبار الجبابير
يا مرحبا في مرحبا كل ساعه
يا فزعة المضيوم ستر الغنادير
في مجلس اللي ما يخونه ذراعه
خالد حفيد مفرقين الطوابير
في مجلسه تلقى الثلاث الولاعه
العود الازرق والشحم والمباهير
وثنتين ضيفه ما تفارق سماعه
يا مرحبا .. ومية هلا بالمسايير
واللي بعدهنه من أميز طباعه
يضحك حجاجه لا لفوه المسافير
شيخٍ يفوق المدح شبره وباعه
مع درب ابو محسن زبون المخاسير
اللي خذا كل المراجل قلاعه
يا قوم يا حاتم ويا سالم الزير
وخالد مشى دربه بعرف وبراعه
ومثل محمد صخر الصعب تصخير
ذيعي كلامي يالصحف والاذاعه
ما بارت عيال الصقور المشاهير
من حشمته سقت القدم لجتماعه
لو كان من دونه طوال المشاوير
ماني بمن يترك حقوق الجماعه
ويدس راسه سد سور المعاذير
اليا دعوني قلت سمعٍ وطاعه
لا يمكن اقصر ولن شفت تقصير
اشتالها شيل البعير لمتاعه
واركي مثل ما للهواء يركي النير
يا كم غدالي ما شحني ضياعه
القى العوض عند الرجال المناعير
وكلٍ يجي كيله على قدر صاعه
ولا يبخس المكيال غير المعيثير
تحمليني يا حروف الطباعه
ضمنت في بطون التعابير تعبير
سوق الغلا ما أجلب له ادني بضاعه
انقى واكب الباقيه للمداوير
وعن حذفة الحذاف عندي مناعه
وان صابني حذفة قفى قلت تكفير
والشعر ياشعار ذكر وشفاعه
ولاخير فيه ان ما حصل منه تذكير
يا ربعنا الغالين معكم وداعه
تكفون ياهل المعرفة والتدابير
بين القبيلة لا تصير القطاعه
تنبهوا قبل اختلال المعايير
يالربع مال الشر قمه وقاعه
وسود الليالي بالبلاوي معاشير
كم راس مزمومٍ تعاوى سباعه
على تفرقنا تسوق التباشير
اقولها والنار وسط السراعه
ولو يلحق اصبع فجر الوضع تفجير
وان دخنت ضاق الفضاء واتساعه
يالله تكافينا شرور المقادير
يقولها اللي قالها من قناعه
ولو ما هرج يمكن تطق الازارير
وعداد براقٍ شعاني شعاعه
يا مرحبا ترحيب حشمه وتقدير



[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]






بعد ذلك اعلن مقدم الحفل عن الموعد المرتقب مع اسد النباعين الشاعر الكبير/ عبدالله بن دخيل الله بن دهيران، حيث أروى هذا الأسد اذواق المتعطشين لقصائده الجزله على صوته المزمجر، حيث قال في قصيدته:





يالرباعين الشيوخ اللي تفكون الجهامه
مرحبا عداد ما ذعذع من الغربي هواها
يا سلايل شيخ روق اللي ليا جرد حسامه
مسلط اللي له فعول ثابته محد غواها
مرحبا عداد همال غشا سيله عدامه
مرحبا بشيوخ روق اللي رضانا من رضاها
عند شيخ داعين ربعه على طيب وكرامه
القبيله طيبها من طيب رجال دعاها
العقيلي شيخ من جده وكفو للزعامه
اسرة بين القبايل عارفين مستواها
مستواها ساس امارة من رياجيل الشهامه
الاماره من على طلمس ورثها ما شراها
طلمس اللي في زمانه كلن يريد السلامه
السلامه منه مكسب بالديار اليا غزاها
ما فعل فعله ولا رجل لبس فوقه عمامه
يوم لضيا في يمينه ما توخر عن عشاها
من يعذرب بعوجتها ما حصد غير الندامه
ذاق فعلٍ من يمين الشيخ يوم انه رماها
قام يردح واعتزا باسمه وبسم ابنا عمامه
قال ذقها يوم بذتني وبذ الله خفاها
انشدوا عن ما ذكرت وكل شي له علامه
العلامه بالرجال اللي تقدر من لحاها
بعدها تسلم يابو نايف وعدتك الملامه
ما فعلته للقبيلة صار غايتها ومناها
انت من يسهر لجل ربعه وعذر في منامه
مقصدك عز القبيلة ما تبا والله جزاها
وبن عمك خالد اللي لحتزم يكرب حزامه
ولد من لقال له كلمه وقف ثم احتماها
جل ربي يرحمه ويحط بالجنه عظامه
ذاك اخو شيخه محمد مثل نور في سماها
ومثل عيدان ابن نايف عندنا زاد احترامه
بالتواضع والصفات الطيبه يوم احتواها
وربع ابن خيشوم بالماقف وهذا من كلامه
من كلام حمود جمع للقبيله بامراها
والردي معروف له راس كما راس النعامه
ما يعرف الصايبه والمخطيه يمشي وراها
اكشفوه وعرفوا انه تو ما قرب فطامه
والخبر من مربيته بعد كمل غذاها
اكشفو عنده ثلاث أمور أولها الرخامه
والحسد والحقد في نفسه وهذا هو بلاها
لو تميدح بالعلوم ولو يزيد بطول قامه
نفسه المرتاحه المقرود زود من عناها
قول شاعر من بني نبعان ويقدم سلامه
والمواقف مع بني عمه تسره ويحماها
يفتخر بالاد عاصم تاج راسي فوق هامه
والقبيله والله انا ما نبا شقرة عصاها
عاش ابو متعب ملكنا يرفع الله من مقامه
كفه اللي خيرها بالمملكه زايد عطاها
ونايبه سلطان للقوات غيث من غمامه
حامين للمملكه ضد المعادي لا نواها
عاشوا ال سعود اهل حكم تميزوا بالصرامه
عايشين فالبلاد بنعمه محمد لقاها
دولة التوحيد تبقاء والفخر لبس وسامه
نحمد الله بالامان وعايشين في ذراها
مرحبا عداد همال غشا سيله عدامه
مرحبا بشيوخ روق اللي رضانا من رضاها



بعد ذلك ألقى الشاعر المبدع صاحب المعاني القويه والقصائد الجزله ، والمواقف المشرفه مع أبناء عمومته الشاعر/ صالح بن رداد العصيمي قصيدة قال فيها:





الشعر يا شعار كلٍ جابه
واكبر فخر لا صار قدم عتابه
يا مرحبا باسم العقيلي خالد
أحد شيوخ الشمل نعم اللابه
شيخ على راس السنام شداده
ما هيب شيخة عالم كذابه
شيخ ليا من قال انا اخو شيخه
كم شيخ قوم طاح من مخلابه
جده وابوه مورثينه لضيا
لضيا تلضا ثابت مظرابه
أكثر من العشره شيوخ جدوده
من ساس عاصم شيخته وانسابه
عقايلة يا نعم يوم اذكرهم
من فعلهم جيش العدو نهابه
خسران من جاء قدمهم ما يربح
واللاش دايم ما نحسب حسابه
والبل ليا اخذوها تعب راعيها
ما يلحقونه قومها الطلابه
وحجاج بيت الله ليامن حجوا
بالشام لين يشاهدون هضابه
تحت حماه ولاحدٍ يقربهم
حتى يعود من يحج لبابه
وأشراف مكه يوم جتنا منهم
عليهم ايام القسى قلابه
ذاق الشريف الحربه المسنونه
ولا تحمي الاتراك من قلنا به
دخل عليه الشيخ طلمس بيته
يرد على راسه ويدقم نابه
وناصر فعوله عند اهالي رنيه
شيخ يقود القوم في شبابه
عمره ثمان سنين شيخ وفارس
من فوق صفرا مهرة وثابه
وغزيزة الشيخان عزله دايم
من كسبه اللي من خصيمه جابه
وفعولهم لو جيت ابا احصي واجد
تملى الكتب وتعجز الكتابه
لكن باقي واحد ما قلته
وهو شيخنا اللي كلنا نرضابه
عقايلة وذعار راس الشيخه
شيخ على راس الهرم نرقابه
شيخ سمابه فعل ابوه وجده
مقدم عصيم ان جاتنا غصابه
وآلاد عاصم عزوتي وربوعي
بالسلم ولا كان جات حرابه
أهل الشجاعة والكرم والنخوه
والسيف قوة سلته بنصابه
مركي عتيبه في نهار الشده
ركنٍ عدانا فاللقاء تهابه
وارجع بترحيبي لذخر محصن
شيوخ روق ودرعها وحجابه
اهل صيانا بالحشو مزبوره
واهل دلال تتعب الصبابه
شيوخ روق اليا اعتزوا في سبلا
السيف وسط الجمجمه مضرابه
وان جيت با اذكرهم نفذ مخزوني
فوق الوصف فوق الشعر وآدابه
واللي حضر في حفلنا شرفنا
يا مرحبا واهلاً هلا واهلابه
والمعذره وان جاء قصور مني
العذر منكم يا شيوخ عتابه



منقوول

بعد ذلك ألقى الشاعر الرائع وهو أحد ضيوف الحفل المبدع/ سعود بن محمد بن عمر العظياني قصيده رائعه ابدع فيها وصفق معه الجميع حيث قال:





ابد بذكر الله عزيز الجلالي
الواحد المعبود علام الاسرار
سبحانه الخلاق مرس الجبالي
الهنا الواحد هو النافع الضار
وسلام يا اهل الطيب في كل حالي
يا اهل السخاء واهل المواجيب والكار
يا روس قومٍ يحتمون التوالي
وافعالهم يشبع بها الذيب والطار
وانتم هل الفزعه من اول وتالي
وانتم هل الجزله عزيزين الاذكار
روس الرجال اهل الفعول الجزالي
سمو العقيلي طيب الفعل والشار
في ظل شيخٍ يرتقي للمعالي
الشيخ خالد مكرم الضيف والجار
الطيب كسبه من سنينٍ طوالي
واله مع اهل الطيب قيمه ومقدار
كريم سبلا وافيٍ بالخصالي
عنده اكرام الضيف في خير معيار
على مفاطيحٍ وعلى جمالي
والعود الازرق والمعاميل حضار
والبن والهيل الخضر فالدلالي
ويلقا الشحم والطيب مع شبة النار
ابو محمد من زحول الرجالي
شيخاً على الجزلات صامل وصبار
ابمدحه يومٍ جالي مجالي
ومدحي ماهو موفيه تكرار وامرار
مقدام قرم وشيخ يرقا الطوالي
من آلاد عاصم كنهم ضلع سنجار
من روس برقا يوم عد الفعالي
وبرقا هل الوقفه طويلين الاشبار
ويامرحبا ترحيب غالي لغالي
بشيوخ وابنا شيوخ من نسل الاحرار
شيوخ روق اهل الفعول الثقالي
امارة ماهي بمرسوم واصدار
امارة بالسيف والفعل طالي
يشهد بها من هو على الأرض ديار
هاذي حقيقة والحقيقة تقالي
والقول ما يوفي ولا توف الأشعار
ابن ربيعان الفخر والمعالي
امير قوم وللمهمات جبار
امير من فوق القبيلة ضلالي
مزبن العاني ومن جاه منجار
شيخ لفعل الطيب والعز نالي
للمرجلة باني وللمجد عمار
وهو مزبن المحتاج لا جاه جالي
وهو مزبن اللي ذاق لوعات الاقدار
وعون الفقير اللي حدته الليالي
وبيته مقر لكل ناصي وخطار
ذكره تشعشع به هبوب الشمالي
ويشيع ما بين المواطن والاقطار
كساب للجزله كريم السبالي
عوايده للكيف والحيل دمار
وافعالهم فيما مضى راس مالي
تاريخ للأجيال نوماس واشعار
وفي وقتنا الحالي بعزٍ وفالي
اهل القيم واهل المواجيب الاخيار
وحنا عتيبه محتمين التوالي
لا قامت الهيجاء ولا صار ما صار
بالهيبه اللي فعلها لا يزالي
يفر منها كل عادي وبوار
وحنا عتيبه مجدنا فالعلالي
شيوخ فارساناً للاخصام قهار
وحنا عتيبه مرخصين الريالي
اهل الفخر واهل المواجيب والكار
وحنا عتيبه طيبين الخوالي
برقا وروق امجادنا فوق الاقمار
وحنا هل الوقفات واهل الكمالي
وحنا هل الخيل الأصايل والامهار
دخيلنا يامن بوسط الظلالي
سنه وشهرينٍ على عز وستار
سلمٍ لنا ماهوب قولٍ يقالي
والنا على روس المخاليق منظار
ويالله يا ربٍ عليك اتكالي
احفظ ملكنا واحفظ الدين والدار
واجعل لروس الشر منك الزوالي
آمين يا حيٍ للأموات قبار
وانا من اهل الطيب عمٍ وخالي
عريب جد ومنبعي نسل الأحرار
من آلاد عاضي فعلها فوق عالي
يشهد لنا بالطيب في كل الأمصار
وسلام ياهل الحفل عد الخيالي
وعداد ما هلت هماليل الأمطار
وعداد ما تذكري هبوب الرمالي
يضفي على أهل الحفل اكبار وصغار
وصلوا على خاتم جميع الرسالي
محمد المبعوث هو خير الأبرار



بعد ذلك حان الموعد مع الإبداع ، وأسلوب الكبار ، وألغاز القصائد التي تعطي طابعاً خاص عند سماعها، حينما أعلن مقدم الحفل عن موعد قدوم فقرة الشاعر الكبير والمعروف/ تركي بن مزيد الحسيني العصيمي شاعر المحاوره والنظم المعروف، حيث ألقى في البداية شيلة بصوته الجهوري المميز قال فيها:





باسم العقيلي شيخنا طير حوران
اللي وجوده يرفع المعنوية
يا مرحبا بمرجحة كل ميزان
بشيوخ روق أهل الوفاء والحمية
والله ونعمٍ في سلالة ربيعان
حماية القالات في كل هيه
وانا لقيت بصفحة المجد عنوان
لاسماءً شهيرة والحروف أبجدية
تركي ومسلط شانهم فاللقاء شأن
يوم الجهل والعالم الجاهلية
وطلمس وعبدالله والآخر سليمان
على عصور الدولة الهاشمية



ثم بعدها ألقى قصيده راااااائعه بكل ما تعنيه الكلمه وتعبر عن بعض ما نشاهده في هذه الأيام من وقائع تحدث أمام أعيننا ، فكائنه يصف لنا بعض من الواقع وهذه هي عادة الشعراء الكبار الذي يستطيعون الوصول إلى أهدافهم بأقصر الوسائل وأقل التكاليف فكما قيل "ما قل دل وزبدة الهرج نيشان = والهرج يغني صاملة عن كثيرة" حيث قال شاعرنا:





ياللي على أعراض الأوادم تسلا
لبد تلقى غيرها ما يسليك
يا هني من حج الفريضه وصلى
ولا انت في هرج القفاء ما نهنيك
ودك ترد اللي سبقك وتعلى
لكن ما يمديك فاتك ما يمديك
تونس على كبدك من الكيد ملى
خل الحسد يشويك والهم يشويك
ما يحسد الشجعان غير الأذلى
ولا يحسد الأحرار غير المماليك
شانت طبوع الناس لا والله الا
لازم تعذرب فيك لو كان ما فيك
والناس هاذي ما تخلي مخلى
لو رحت عنها في خلا ما تخليك



ثم بعد ذلك ألقى أحد ضيوف الحفل وهو الشاعر الرائع/ منيع بن فهد الذيابي الروقي قصيدة قال فيها:





سلام في مبداء القصيده وردها
سلام من قبل السوالف وعدها
رديةٍ تظفي ويطغي وقارها
إلى رؤس قوم بالعزة نودها
قوم بها المعروف والجود والثنى
اصالة الأمجاد وفيهم مردها
اقولها من هاجسي واكتب احروفها
والعود الازرق والريحان والمسك ندها
على من دعانا ثم جينا لدعوته
زيزوم الأرياء والدعاوي يسدها
خالد محمد وطيب القول يسمعه
وكل الأمور الكائدة نعم قدها
شيخ به الأشعار تفخر وتقتبس
قناديل نورا بالدجاء مستمدها
آلاد العقيلي عاقل الفكر صائبه
كم من معادين القبائل يحدها
اليا قيل للعتبان في كل حاجه
آلاد عاصم بالفعائل نعدها
ويوم الشيوخ أهل الوفاء قدموني
قالو عليك وكلمه الحق بدها
ماني بناسيهم وناسي حقوقهم
ومشهور سبلا بالمعارك يكدها
كم سربة قدام عينه يحدهم
في نجد يوم يصافح السيف خدها
ذولا رباعين بهم كامل الصخاء
اليا ضاق ناظرها على مجرهدها
ابن سبيل قد ذكرهم بقوله
اجاد وصفه بالمثائل وردها
وآلاد روق الهون ما يقبلونه
اليا شدت حمول الزوامل بشدها
يرسون مثل طويق والنير ما نسي
ذكرى حرار ماكره مستهدها
ذيابي ولي في طائل المجد منزله
ماصد ولاقبل للمشاكيل صدها
قبيلة فيها الكرم والشجاعة
تصبر ولو طال الدهر ما يهدها
ويوم ان اخو نوره بسيفه حكمها
وحد طوارفها وعينه يلدها
عم الأمن واظفى علينا جوانبه
وملك اقلوب الناس والناس ودها
والحمد لله في ولات العداله
شوامخ ما زعبل الخوف ضدها



بعد ذلك تجدد اللقاء مع الشاعر المميز الذي تعودنا منه على الجزاله دائماً في كل بيت من ابياته وهو الشاعر/ معيض بن محمد العصيمي ، حيث شارك بقصيدة عصماء قال فيها:





اخير ما ابدابه المكتوب وسطوره
ذكر الله اللي يعلم السر والغيبي
عظيم قدره وكل امر بمقدوره
ولا راد لأمره ليا راد المكاتيبي
يالله عسى ارواحنا بالعفو مغموره
انت رجانا بلا شك ولا ريبي
وما دامت النفس منهيه وماموره
في دبرة الخالق مدير الهباهيبي
لا شك في الصائبه ماهي بمعذوره
يقضي الفتى غايته لو دربه تعيبي
والهاجس اللي يبين ولا اختفى دوره
من صبح قامت تراوده الهناديبي
قلطت له ضيفه اللي جاي يزوره
وأوفيت قدره وقدره حق ومصيبي
وطلبت ربي يسمح باقي أموره
ويحقق اللي بغيته من مطاليبي
يلقى الشعر مقصده ويطل بحضوره
ويبديبه الشاعر بروس المراقيبي
ويقضي غرض صاحبه ويترجم شعوره
باجزل معانيه واختيار الأساليبي
بالذات لا قيل في عزوه ومشهوره
انا اشهد انه يزين الشعر ويطيبي
اتعب على الشعر واسبح غبة بحوره
وقسمي يجمل مع طوال الأشانيبي
واكسب رضا اللي يقوم الراي من شوره
احرص على صحبته واعده صحيبي
شهم عن الطايله ما تقصر شبوره
وليا اعتزى يعتلي في أعلى المذاريبي
والا الردي ما يهم رضاه وسروره
ضحوك في الوجه ذاب العراقيبي
والليلة الليل طاب وغاب ديجوره
طلت عليه النجوم اللي مراقيبي
في المحفل اللي يزيد النور من نوره
وتلتم فيه الرفاقه والأصاحيبي
يا مرحبا عد نبت الوسم وزهوره
في حلة اهل الكرم واهل التراحيبي
العزوة اللي لهم وقفات مخبوره
بالطيب والطيب من عادة هل الطيبي
عقايلة منبع الامجاد ونموره
اهل العوائد واهل حفظ المواجيبي
باسم العقيلي هلا بالحفل وحضوره
شيخ القبيلة عريب الأصل وعتيبي
قول وفعل شيخته ماهي بمكبوره
ما تعتريها النقادة والعذاريبي
سلالة اللي لهم صولات مذكوره
قوم على المعتدي سم وعواقيبي
شلفا العقيلي لها بصمة وماثوره
كلن عرفها عطيبات المضاريبي
وآلاد عاصم عمى اللي زاد في جوره
سقم المعادي مطوعة الأصاعيبي
يوم البلد ساحته غارات وخطوره
ومواجه القوم بخشوم المساليبي
ياما ثنو من حريب تبدي سبوره
وصار المعادي عشى للطير والذيبي
بسيوف ورماح لأهل الشر مشروره
وصنع الفرنجي نحيلات المقاضيبي
وامدح شيوخ الوفاء والعز وصقوره
قوم الشرف والرتب واهل المناصيبي
تركة محصن لهم رايات منشوره
جمع الرباعين ساس العرف والطيبي
تاريخهم حافل بأمجاد مسطوره
وزاعمة اللي يحوشون المكاسيبي
وربعي عتيبه حصون الدار وجسوره
يوم المغازي ودقلات الأجانيبي
وكرام وقت القسى والدهر وعصوره
لو شحت سنينها الغبر الشلاهيبي
والله يحفظ البلد ويدعم دستوره
ويكفيه شر الفتن واهل المشاهيبي
ويعز حكامنا عيال أخو نوره
أهل الولاء والعدل نعم المعازيبي
هذا كلام العصيمي تمت سطوره
والشكر لله عليم السر والغيبي



بعد ذلك شارك الشاعر المميز/ منصور بن فلاح النفيعي بقصيدة مميزه نالت على استحسان الحضور ، ولكنه للأسف لم نسطتع الحصول عليها وسوف نشاهدها جميعاً في تسجيل الحفل فيما بعد بإذن الله.


ثم تلى ذلك مشاركة للشاعر الشاب صاحب الصوت الشجئ المميز والرائع ، والذي بالرغم من صغر سنه إلى أنه بمثابه بارق الأمل على مستقبل الشعر والإبداع والجزاله في القبيله وهو الشاعر/ سلطان بن دخيل العصيمي حيث شارك بعدة أبيات "شيلة" قال فيها:





بسم النباعين ساس الجود واهل الفعول
العزوه اللي تنومس من تعزوابها
ربعي حزامي ودرع الجنب قومٍ زحول
قطم المحازم هل الصولات واصحابها
جينا العقيلي على حسب الوعد والوصول
شيخن حلال الكرم ما قفل ابوابها



ثم القى بعدها هذه القصيدة:





يا مرحبا ترحيبة عز وشكاله
في الحلال اللي تنومس من يجيها
يا شيوخ آلاد روق اهل الجماله
يا شيوخٍ فعلها يشهد عليها
يوم دورات الرشا فوق المحاله
كم قوم في اللقاء تنثر دميها
يوم وقت الحرب يثبت بالدلاله
وقعت طلال اللي ترى محد بناسيها
والعقيلي عز من جاه وعناله
المراجل كسب ماهوب مشتريها
حي رجل بالكرم فاحت دلاله
لجل ضيفان الكرامه محتسيها
دون ربعه مرخص حاله وماله
منهو اللي لا تعزوا يحتميها
الأمارة حمل جا ثم ارتكاله
يوم بعض القوم ماله حيل فيها
والعصيمي لجلكم متعب جماله
معتلي فوق الرواسي معتليها
دون جم العد ما تقصر حباله
والبحور الطاميه سباح فيها
كلنا عتبان في عزٍ وطاله
ضد للأخصام والهيه نجيها



ثم بعد ذلك حان موعد ختام البرنامج الشعري لتلك الليلة الرائعة ، فكان ختام القصائد عند الشاعر الرائع/ محمد بن فنيس الحلحلي العصيمي ، حيث ابهر الجميع بقصيدته الرائعه التي كانت بالفعل مسك الختام لقصائد الحفل ، حيث تفاعل معها جميع الحضور بالتصفيق حيث قال فيها:





يا مرحبا في حفلنا يالرباعين
ترحيبة ماني بمحصي عددها
يا مرحبا يا مرجحين الموازين
عد المزون وعد ما ارعد رعدها
امزون نوهلت ايسار ويمين
ثم اشتبك همالها مع بردها
ويا مرحبا يا ضيوفنا بالملايين
ترحيبة عقيلي وهذا وعدها
وآلاد عاصم كلبوهم محيين
ترحيب من شيبانها من ولدها
اعزاز وارحب بحفل العزيزين
آل العقيلي اللي تتابع سعدها
قلته وانا عصيمي وذخر الشجاعين
محمد وياتيكم كلامي بعدها
لاجل الغلا جينا من البعد عانين
ولا همنا بعد الديار وكبدها
جينا رضا للراس والخشم والعين
والعين والله ما ندور رمدها
على الوفاء والطيب والجود ضارين
وبني البيوت اطيب لنا من هددها
وليا تذكرنا الرجال المسلمين
يوم الحياه امرار وامر وادها
حنا قرانا للرسايل عناوين
عن شيخة من قبل طلمس عهدها
لضيا وراعيها دليل وبراهين
والفته الشيخه وجاته جهدها
لضيا وراعيها على العسر واللين
يردح من السطره والارض يهبدها
حرٍ ومخر له حرار وشياهين
آل العقيلي من نصاها وجدها
عقايله غالين غالين غالين
مثل البيوت اللي قوي عمدها
عقايله وافين وافين وافين
شهادة مني وغيري شهدها
قامت لهم شيخه لها سنين وسنين
ماهي صغيرة توها في مهدها
ولاي بمبدوعه بيوم ويومين
قدامنا اجيال قرت في سندها
وباذن الولي ترقا وتبقى لبعدين
وحتيش لو ماتت نفوس بحقدها
وحنا على ظهر البسيطة وحيين
وعقولنا ما ضيع الله رشدها
ومن معه فكر يعرف الزين والشين
يدري ويعرف سبتها قبل أحدها
واللي يحاول فرقة بين الأخوين
لا بد تصفقه الليالي بيدها
ونسمع مثل قاله رجال حكيمين
تموت من حل المرض في جسدها
وعلي حقٍ للرجال الميامين
عتيبه الهيلا وحدها وحدها
ربعي عتيبه ملحقين المخلين
لا ناشت خشوم الفتايل زندها
افعالنا ما تنحصي بالدواوين
والحي يفخر باهلها في لحدها
وعن ذكر فعل فات حنا غنيين
ومن كان في نعمه عليه يحمدها
واليوم في حكم العدل والسلاطين
حكام دولتنا ولا احد جحدها
يعيش أبو متعب رفع راية الدين
وأخوان نوره من فهدها لاسدها
وصلاة ربي عد صوت الملبين
على نبينا والصلاوات زدها




بعد ذلك حان مسك الختام لهذا الحفل المبارك ، حينما طلب مقدم الحفل من الشيخ الجليل الداعية/ عبدالله بن حماد العصيمي إلقاء كلمة توعوية للحضور الذي كان مستمعاً لتلك الخطبة الرائعه التي القاها فضيلته ونصح فيها الجميع بتقوى الله والحفاظ على عبادته.


ثم بعدها قام الشيخ/ غالب بن زيد ابو كتيفة ، بدعوة الشيوخ الرباعين وجميع الحاضرين في ذلك المحفل من الحضور للحفل الذي سيقيمة الشيخ/ ضاوي بن زيد ابو كتيفة "شيخ العمرية في الحجاز" على شرف الشيوخ الرباعين وذلك في الطائف يوم الخميس ليلة الجمعة الموافق 27/12/1429هـ، والدعوة عامة للجميع.




بعد ذلك قام مقدم الحفل بإختتام الحفل المبارك ، ثم تناول الجميع طعام العشاء ، ثم ودع الشيوخ الرباعين مكان الحفل مودعين بمثل ما استقبلوا به من حفاوة وتكريم من آلاد عاصم.
[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]


[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]
[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]




منقووول

الصامل بيض الله وجهك الرباعين يستاهلون والشيوخ العقايله يفعلون
حسب ما سمعت انها كانت حفله اكثر من رائعه

احتفال جميل

لكن هذا المقطع من ق2صيدة الشاعر ضاوي العصيمي
ماذا يعني انا ماقدرت افسره اتمنى التوضيح

ماني بمن يترك حقوق الجماعه
ويدس راسه سد سور المعاذير
اليا دعوني قلت سمعٍ وطاعه
لا يمكن اقصر ولن شفت تقصير
اشتالها شيل البعير لمتاعه
واركي مثل ما للهواء يركي النير
يا كم غدالي ما شحني ضياعه
القى العوض عند الرجال المناعير
وكلٍ يجي كيله على قدر صاعه
ولا يبخس المكيال غير المعيثير
تحمليني يا حروف الطباعه
ضمنت في بطون التعابير تعبير

احس ان فيها معني قوي

شرفتوا الاخ كعب

والاخ سامي منصوربمروركم وتعليقكم

والحفل جيد من قصايدهوتنظيمه حسب ماذكر الكاتب

والشاعر ضاوي صحيح معناه قوي ويمكن يقصد جائزة ملتقى عتيبه كان حقه جيب حسب الجوائز

المخصصه ولكن اعطوه ثلاثين اظن وراح الجيب ويمكن يقصد المتسبب ولله واعلم

تم اضافة صور للحفل لايضاح بعض الحضور ويبدومن الحضور بالاضافة للشيوخ الرباعين

الشاعر / تركي الغنامي والكثير من رجال القبيلة

المشاركة الأصلية كتبت بواسطة الصامل

شرفتوا الاخ كعب

والاخ سامي منصوربمروركم وتعليقكم

والحفل جيد من قصايدهوتنظيمه حسب ماذكر الكاتب

والشاعر ضاوي صحيح معناه قوي ويمكن يقصد جائزة ملتقى عتيبه كان حقه جيب حسب الجوائز

المخصصه ولكن اعطوه ثلاثين اظن وراح الجيب ويمكن يقصد المتسبب ولله واعلم

يالصامل
ضاوي لايقصد جائزة قصيدته (الارهاب) التي اخذ عليها المركز الاول لانه معروف جائزتها مسبقا لديه وغيره...
لكن ضاوي يقصد الجائزه التي منحوها العقايله لشاعر اقل شاعريه من ضاوي وليس بمستوى ضاوي وهي قصيدة الفتنه التي اشعلها ابن دهيران في مخيم العقايله بينما قصيدة ضاوي عند العقايله لاتساوي قصيدة ابن دهيران ...في جزالتها ...


ماني بمن يترك حقوق الجماعه
ويدس راسه سد سور المعاذير
اليا دعوني قلت سمعٍ وطاعه
لا يمكن اقصر ولن شفت تقصير اشتالها شيل البعير لمتاعه
واركي مثل ما للهواء يركي النير
يا كم غدالي ما شحني ضياعه
القى العوض عند الرجال المناعير
وكلٍ يجي كيله على قدر صاعه
ولا يبخس المكيال غير المعيثير
تحمليني يا حروف الطباعه
ضمنت في بطون التعابير تعبير

دقق في الابيات اعلاه تجد ضاوي لم يتطرق للملتقى لكن ركز على (الجماعه)

لاهنت يالصامل
الحفل حسب ماسمعت كان رائع ويليق بالشيوخ
والله يجمع قبيلتنا على الخير ويبعد عنهم اهل الحسد

ما يحسد الشجعان غير الأذلى=ولا يحسد الأحرار غير المماليك

هلا بعسيب ووالله يصعب تحديد هدف الشاعر بكل دقه

سالت احدهم وهو مقرب من الشاعر ضاوي فاورد تبرير مختلف يقول يقصد انه لو دعاه اي عصيمي

ما يتاخر حتى لو ان هذا العصيمي باخس حق عيال عمه النباعين واشار له بالمعيثير

عموما القصيدة غايه في الجمال وهذا من عبقرية الشاعر موه المعنى بحيث كل يفسره على هواه

هلا ياراكان والله يجمع الاد عاصم على العز

ويوحد صفهم اميييييييييييييييييييييييييييييييييين